खोलामा माछा मार्दा देउरालीमा खानेपानीको समस्या

प्रिय धन पाण्डे
गिरुवारी । मंगलबार बिहान झिसमिसे बिहानै मा फोन आयो “ लौन हजुर हाम्रो धारामा पानी सानो आयो ,हेर्न आइदिनु पर्यो ” देउराली सोतिखोला खानेपानी सरसफाई तथा उपभोक्ता संस्थाका प्राविधिक प्रमुख खुमलाल पाण्डे लाई हरेक दिन जसो प्रायः यस्तै फोन आउने गर्छ । नेपाल सरकारले गत चैत्र ११ गते देखि लकडाउन लागू गरेपनि देउराली सोतिखोला खानेपानीका कर्मचारीलाई भने कुनै खालको लकडाउन छैन । सधैं जसो धारामा पानी बनाइदिन आउनु पर्यो भने पछि पुगीहाल्नुपर्ने ।
मंगलबार बिहानै धारामा पानी सानो आयो भन्ने फोन का आधारमा उनि हुप्सेकोट ३ बेलहानि बाट वडा नम्बर ४ डिहि मा गए । तर धारामा समस्या केही थिएन । समस्या रहेछ मुहान मा । देउराली सोतिखोला खानेपानी तथा सरसफाई उपभोक्ता संस्थाले पानी ल्याउने गरेको मुहान पत्थर खोला को मुहान मा विगत केही दिन देखि अज्ञात समूहले माछा मार्न थालेका छन् । रातको ११÷१२ बजे तिर गएर ढडिया थाप्ने र बिहानपख ३÷४ बजे नै गएर निकाल्ने प्रवृत्तिले खानेपानीको समस्या भएको प्राविधिक प्रमुख खूमलाल पाण्डेले जानकारी दिए । पाण्डेका अनुसार ती माछा मार्ने व्यक्तिले खानेपानीको पाइप समेत काटिदिएका छन् ।
पछिल्लो समय लकडाउनमा मानिसहरूको आवत जावत रोकिएपछि यस्तो समस्या देखिएको देउराली सोतिखोला खानेपानी तथा सरसफाई उपभोक्ता संस्था का अध्यक्ष मेक बहादुर पुलामीले बताए । “ खानेपानीमा असर पार्ने तरिकाले माछा मार्ने काम भएको छ । माछा मार्नेको हामी खोजी गर्दैछौं , कसले हो भन्ने थाहा पाइएमा कडा भन्दा कडा कारबाही गरिनेछ – अध्यक्ष पुलामीले भने । साथै गर्मी समयमा खानेपानीको समस्या देखिन सक्ने भएकाले अनावश्यक पानीको प्रयोग नगरिदुनुहुन पनि पुलामीले आग्रह गरेका छन् । संस्थामा हाल करिब ३ हजार वटा धारा जडित छन् । पूर्बि नवलपरासी(नवलपुर) जिल्लाको साबिक देउराली गाविस अन्र्तरगतका २,३,४,५ र ६ नम्बर वडाका नागरिकहरुले यस संस्थाको पिउनेपानी प्रयोग गर्दै आएका छन् ।