नवलपरासीको बुद्धिचाल प्रतियोगितामा विरेन्द्रकुमार प्रथम

कावासोती । पूर्वी नवलपरासीको कावासोतीमा भएको जिल्ला स्तरीय खुल्ला बुद्धिचाल प्रतियोगितामा विरेन्द्रकुमार श्रेष्ठ प्रथम भएका छन् । उनले खेलेको सातौं राउण्डसम्मको खेलमा ६ दशमलब ५ अंक ल्याउँदै प्रथम भएका हुन्।त्यसैगरी ६ अंकका साथ पर्शुराम भुसाल द्वितीय भएका छन् भने डा. गोपीनाथ कंडेल ५ दशमलब ५ अंकका साथ तृतीय भएका छन् । त्यसैगरी डा. लक्ष्मीनाथ कंडेल ५ दशमलब ५ अंक सहित चौथो र सूर्यबहादुर खाम्चा ५ अंक सहित पाँचौं भएका छन् । प्रतियोगितामा प्रथम हुनेलाई १२ हजार रुपैयाँ, द्वितीय हुनेलाई ९ हजार रुपैयाँ, तृतीय हुनेलाई ६ हजार रुपैयाँ, चौथो हुनेलाई दुई हजार रुपैयाँ र पाँचौ हुनेलाई १ हजार रुपैयाँ नगद पुरस्कार र प्रमाण पत्र नेपाल बुद्धिचाल संघका महासचिव हिराकाजी महर्जनले प्रदान गरेका थिए।

प्रतियोगितामा ५० भन्दा बढी खेलाडीहरुको सहभागिता रहेको छ । नवलपरासी जिल्ला बुद्धिचाल संघ नवलपुरको आयोजनामा भएको नवौं जिल्ला स्तरीय खुल्ला बुद्धिचाल प्रतियोगिता २ दिनसम्म चलेको थियो । प्रतियोगितामा हेमन्तप्रताप थापा मगर उत्कृष्ठ खेलाडी घोषित भएका थिए भने सबैभन्दा कम उमेरका खेलाडी अनुपम कंडेललाई पनि पुरस्कृत गरिएको थियो । उत्कृष्ठ खेलाडी र कम उमेरका खेलाडी दुवैलाई नगद एक÷एक हजार रुपैयाँ र प्रमाण पत्रले पुरस्कृत गरिएको नवलपरासी जिल्ला बुद्धिचाल संघ नवलपुरका अध्यक्ष बाबुराम पोख्रेलले बताए ।

प्रतियोगिताको शुक्रबार उद्घाटन गरिएको थियो । प्रतियोगिता शनिबार अबेर सकिएको हो। प्रतियोगिताको उद्घाटन कार्यक्रममा मध्यविन्दु बहुमुखी क्याम्पसका क्याम्पस प्रमुख मुक्तिराम पाण्डे, जिल्ला खेलकुद विकास समिति नवलपुरका अध्यक्ष विकास केसी, नेपाल बुद्धिचाल संघका केन्द्रिय सचिव धर्म लामा लगायतले शुभकामना मन्तव्य राखेका थिए । नवलपरासी जिल्ला बुद्धिचाल संघ नवलपुरका अध्यक्ष बाबुराम पोख्रेलको अध्यक्षतामा भएको उद्घाटन कार्यक्रम गोपीनाथ कंडेलको स्वागत र सचिव विश्वनाथ पाण्डेको सञ्चालनमा भएको थियो । उद्घाटन कार्यक्रममा बोल्ने वक्ताहरुले बुद्धिचाल खेल एउटा खेल मात्र नभएर मानिसलाई ध्यान केन्द्रित गराउने र बौद्धिक क्षमता पनि बढाउने खेल भएकोले बुद्धिचाल खेल निक्कै राम्रो भएको बताएका थिए ।