प्रहरी हिरासतमा रहेका थुनुवाको मृत्यु

चितवन। चितवनमा प्रहरी हिरासतमा रहेका एक थुनुवाको मृत्यु भएको छ । इलाका प्रहरी कार्यालय रत्ननगर टाँडीको हिरासत कक्षमा रहेका एक थुनुवाको आज बिहान मृत्यु भएको हो ।

मृत्यु हुनेमा रत्ननगर नगरपालिका–१३ बस्ने ४५ वर्षीय महमद क्यामोदिन रहेका छन् । अपराधिक लाभ कसुरमा कात्तिक १ गते पक्राउ परेका उनीमाथि अनुसन्धानका लागि पाँच दिनको म्याद थप भएको थियो ।

आज बिहान ४ः४५ बजेको समयमा थुनुवा कक्षको बाथरुमको ढोका छेउमा घोप्टो अवस्थामा महमद क्यामोदिन फेला परेको जिल्ला प्रहरी कार्यालय चितवनका प्रवक्ता भेषराज रिजालले जानकारी दिए । उनलाई उपचारको लागि भरतपुर अस्पताल ल्याएकोमा चिकित्सकले मृत घोषणा गरेको उनले बताए ।

मृतकको शवलाई भरतपुर अस्पतलाको शव गृहमा राखिएको छ । घटनाको अनुसन्धानका लागि जिल्ला प्रहरी प्रमुख एसपी भावेष रिमाल नै खटिएका छन् ।