![](https://www.namunapost.com/wp-content/uploads/2024/09/999.jpg)
नवलपुर । नवलपरासी पूर्वको मध्यविन्दु बहुमुखी क्याम्पस विद्यार्थीहरुको माग प्रति अनुदार बनेको छ । जिल्ला कै उत्कृष्ट शैक्षिक संस्थाको रुपमा स्थापित क्याम्पसका विद्यार्थीहरु १० प्रतिशत छात्रवृत्तीको माग गर्दै आन्दोलित छन् ।
स्वतन्त्र विद्यार्थी युनियन मध्यविन्दु क्याम्पसले चार दिन देखि विद्यार्थी संख्याको आधारमा १० प्रतिशत छात्रवृत्तिको व्यवस्था गर्न माग गर्दै आन्दोलन गरिरहेका छन् । चार दिन देखि विद्यार्थी आन्दोलित हुदाँ क्याम्पस प्रशासन भने अन्य तहबाट आन्दोलन स्थगित गर्न दवाव सृजना गर्ने रणनीतिमा देखिएको छ । आन्दोलन रोक्न भन्दै पार्टी नेता देखि संगठनका केही व्यक्ति परिचालन गरेको स्ववियु सदस्यहरुको आरोप छ ।
‘हामीले विद्यार्थीको अधिकार मागेका हौं । विद्यार्थी संख्याको आधारमा छात्रवृत्ति व्यवस्थापन होस् हामी सबै आन्दोलनका कार्यक्रम स्थगित गर्छौं ।’ – स्ववियु सभापति केशव भुसालले भन्नुभयो । स्ववियुले छात्रवृत्ति व्यवस्थापन दवावका लागि विद्यार्थी हस्ताक्षर संकलन सहित सिठ्ठी जुलुस, पर्चा वितरण लगायतको कार्यक्रम सम्पन्न गरेका छन् । आफ्ना माग पुरा नभए शुक्रबारबाट क्याम्पसमा तालाबन्दी गर्ने स्ववियु सभापति भुसालले बताए ।
विद्यार्थीको माग प्रति क्याम्पस गम्भीर भएपनि तत्काल विद्यार्थीको माग सम्बोधन गर्न सक्ने अवस्थामा क्याम्पस प्रशासन नरहेको क्याम्पस प्रमुख गणेशमान गिरीले बताउनुभयो । ‘क्याम्पसमा कति प्रतिशत छात्रवृत्ती दिने भन्ने विषय क्याम्पस सिनेटको क्षेत्राधिकारको विषय हो । हामीले गर्न सक्ने भनेको सिफारिस मात्रै हो ।’– गिरीले भन्नुभयो – ‘सेमेष्टर प्रणालीको हकमा १० प्रतिशत कार्यान्वयन गरेका छौं ।’
क्याम्पसमा अध्ययन गर्ने सबै विद्यार्थीलाई समान दृष्टिले सुविधाको वितरण हुनुपर्ने स्ववियु सहसचिव सन्तोष गिरीले बताउनुभयो । ‘समस्या प्रध्यापकहरुमा नै देख्छु म त । कतिपय प्रध्यापकहरु आफैं नीजि विद्यालय सञ्चालक हुनुहुन्छ । यता दिएसी उतापनि दवाव पर्छ भन्ने पनि होला ।’
मिड पोइन्ट रिसर्च,इभेन्ट एण्ड मिडियाद्वारा संचालित
नमुना पोष्टडट कम का लागि
कावासोती - ३ नवलपुर
9867130145
[email protected]
सूचना विभाग दर्ता नम्बर: ४२६०-२०८०/२०८१