मूल्यवृद्धिको विरोधमा अनेरास्ववियुको कावासोतीमा प्रदर्शन

कावासोती । पेट्रोलियम पदार्थमा सरकारले गरेको मूल्यवृद्धिको विरोधमा नेकपा एमालेको विद्यार्थी संगठन अनेरास्ववियु नवलपुरले विरोध प्रदर्शन गरेको छ । मंगलबार कावासोतीको फलफुल चोकमा अनेरास्ववियुमा आवद्ध विद्यार्थीहरुले नारा जुलुसहित प्रदर्शन गरेका हुन् । त्यस क्रममा प्रहरीले हस्तक्षेप गरी विद्यार्थीहरुले जलाएको टायर खोसेर निभाएको थियो ।

नेपाल आयल निगमले आइतबार मात्रै पेट्रोलियम पदार्थमा मूल्यवृद्धि गरेको छ । पछिल्लो एक हप्ताका बीचमा पेट्रोलमा एक लिटरमै २० रुपैयाँ मूल्य बढेको छ । अनेरास्ववियु नवलपुरका नेता सुरज सापकोटाले सरकारले पेट्रोलियम पदार्थमा गरिएको मूल्यवृद्धि फिर्ता गर्न माग गरेका छन् । उनले सरकारले तत्काल मूल्यवृद्धि फिर्ता नगरे थप आन्दोलनको कार्यक्रम गर्ने बताएका छन् ।