मध्यविन्दुमा निशुल्क पशु स्वास्थ्य शिविर

प्रियधन पाण्डे
चोरमारा । पूर्बि नवलपरासीको मध्यविन्दु नगरपालिका वडा नम्बर ११ मा शनिबार पशु स्वास्थ्य शिविर तथा औषधि वितरण कार्यक्रम सम्पन्न भएको छ । कोरोना भाइरस नियन्त्रणका लागि जारी गरिएको लकडाउनको कारण पशुपालक कृषक हरुमा समस्या हुनसक्ने भन्दै नगरपालिकाले एक औपचारिक कार्यक्रम नै सञ्चालन गरी शिविर सम्पन्न गरेको हो ।
नेपाल पशु स्वास्थ्य प्राविधिक सेवा संघ नवलपुरका अध्यक्ष विकास कुमार श्रेष्ठको अध्यक्षतामा एबम् मध्यविन्दु नगरपालिकाको प्रमुख चन्द्र बहादुर राना को प्रमुख आतिथ्यतामा सो कार्यक्रम सम्पन्न भएको थियो । कार्यक्रममा छोटो मन्तव्य राख्दै नगरप्रमुख रानाले कृषकहरुको समस्या प्रति आफूहरु अत्यन्तै सजग भएको र आगामी दिनमा अन्य वडाहरूमा पनि कृषक हरुका समस्या पहिचान गरी सोही अनुसारको राहतका कार्यक्रम सञ्चालन गरिने बताए । त्यस्तै नेपाल पशु स्वास्थ्य प्राविधिक सेवा संघ नवलपुरका अध्यक्ष विकास कुमार श्रेष्ठले लकडाउनका कारण पशुपालक कृषक समस्यामा परेको भन्दै वितरित सम्पूर्ण औषधिहरुमा कुनै शुल्क नलिइएको बताए ।
सो शिविर मा मध्यविन्दु नगरपालिका वडा नम्बर ११ का करीब २ सय घर धुरीमा पशुपालक कृषकहरुलाई पशुका लागि आवश्यक औषधि वितरण गरिएको बताइएको छ । गाई , भैंसी , राँगा , बाख्रा , बंगुर , कुखुरा आदिका लागि समस्याको पहिचान गरी औषधि वितरण गरिएको मध्यविन्दु ११ का वडाध्यक्ष चन्द्र बहादुर दरैले जानकारी दिए । कार्यक्रममा मध्यविन्दु १० का वडाध्यक्ष चुरा बहादुर थापा , मध्यविन्दु नगरपालिकाको पशु स्वास्थ्य प्राविधिक ज्ञान प्रसाद भट्टराई , प्रहरी चौकी अरुणखोलाका प्रमुख जनक बुढा लगायतको उपस्थिति रहेको थियो ।