अज्ञात समूहबाट धौवादीको इलाका प्रहरी कार्यालय रुद्रपुर खाली गर्न धम्की

तिर्थराज डुम्रे
कावासोती । अज्ञात समूहद्धारा नवलपरासी (बर्दघाट सुस्ता पूर्व) जिल्लाको हुप्सेकोट गाँउपालिका–५ धौवादी रुद्रपुरमा रहेको इलाका प्रहरी कार्यालय रुद्रपुरका प्रहरी नायव निरीक्षक (सई) गंगाराम कोइरीलाई प्रहरी कार्यालय खाली गर्न भन्दै धम्की आएको छ । सई कोइरीलाई फोनमा म्यासेज मार्फत प्रहरी कार्यालय खाली गर्न भन्दै धाम्की आएको हो ।
कात्तिक १९ गते मंगलबार सई कोइरीको मोबाईलमा आज्ञात नम्बरबाट –“युद्ध गर्ने भए युद्धको लागि तयार भएर बस्, नभए हतियार छोड, चौकी खाली गर” भन्दै धम्की आएको थियो । अज्ञात समूहले फोनमा म्यासेज मार्फत धम्की दिएपछि सई कोइरीले जिल्ला प्रहरी कार्यालय नवलपरासी (बर्दघाट सुस्ता पूर्व)मा घटनाबारे तत्काल जानकारी गराएका थिए ।
सईलाई म्यासेज मार्फत प्रहरी कार्यालय खाली गर्न भन्दै धम्की आएपछि मंगबार जिल्लाका सुरक्षा निकायलाई सर्तक बनाईएको थियो । घटनाबारे जानकारी प्राप्त भएपछि जिल्ला प्रहरी कार्यालय नवलपरासी (बर्दघाट सुस्ता पूर्व) बाट प्रहरी निरीक्षक राजन ढकालको नेतृत्वमा एउटा टोली ईलाका प्रहरी कार्यालय रुद्रपुर गएको थियो । राति नै रुद्रपुर पुगेको टोलिले घटनाबारे थप अनुसन्धानसंगै इलाका प्रहरी कार्यालयको सुरक्षा सर्तकता बढाएको थियो । सो टोलि बुधबार बिहान जिल्ला प्रहरी कार्यालय फर्केको छ ।
मंगलबार घटनाबारे जानकारी पाएपछि प्रहरीको एक टोलि रुद्रपुर पुगेको थियो भने अर्को टोलि कावासोतीमा तयारी अवस्थामा बसेको स्रोतले बतायो । जिल्ला प्रहरी कार्यालय नवलपरासी (बर्दघाट सुस्ता पूर्व)ले घटनाको बारेमा सशस्त्र प्रहरीलाई समेत जानकारी गराएको थियो । प्रहरीबाट घटनाको बारेमा जानकारी पाएपछि सशस्त्र प्रहरी कार्यालय चोरमाराको टोलि समेत तयारी अवस्थामा बसेको थियो ।
घटनाको बारेमा बुझ्न इलाका प्रहरी कार्यालय रुद्रपुरका सई गंगाराम कोइरीसंग सम्पर्क गर्दा सई कोइरीले जिल्ला प्रहरी कार्यालयमा सबै विवरण पठाएको भन्दै जिल्ला प्रहरी कार्यालयमा नै बुझ्न आग्रह गरे ।
इलाका प्रहरी कार्यालय रुद्रपुरका प्रमुख सई गंगाराम कोइरीलाई धम्की आएको बिषयमा थप अनुसन्धान भइरहेको जिल्ला प्रहरी कार्यालय नवलपरासी (बर्दघाट सुस्ता पूर्व) का डिएसपी अर्जुन रानाभाटले बताए । इलाका प्रहरी कार्यालयको सुरक्षा सर्तकता बढाउनु संगै घटना सम्बन्धी थप अनुसन्धान भइरहेको उनले बताए ।
इलाका प्रहरी कार्यालय रुद्रपुरमा सई गंगाराम कोइरीको कमाण्डमा पाँच जना नेपाल प्रहरी कार्यरत छन् ।